ការតាំងពិព័រណ៍ផ្សព្វផ្សាយពីបញ្ហាប្រឈមផ្នែកសុខភាពនៅអាស៊ីអាគ្នេយ៍
នៅទីស្នាក់ការរបស់ទីភ្នាក់ងារអភិវឌ្ឍន៍បារាំងប្រចាំកម្ពុជា កំពុងមានការតាំងពិព័រណ៍រូបភាពមួយស្តីអំពី « ជំងឺលេចឡើងសារជាថ្មី ៖ បញ្ហាប្រឈមថ្មីៗផ្នែកសុខភាពនៅអាស៊ីអាគ្នេយ៍ » ដែលបើកជូនសាធារណជនចូលទស្សនាដោយសេរីរហូតដល់ថ្ងៃទី៣០ ខែតុលា (ទីតាំងនៅកែងផ្លូវព្រះអង្គអេង ឬផ្លូវលេខ១៣ និងផ្លូវលេខ១០៦)។ ពិធីសម្ពោធពិព័រណ៍នេះបានប្រព្រឹត្តទៅកាលពីចុងសប្តាហ៍មុន ដោយមានការចូលរួមពីលោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា។
ពិព័រណ៍នេះមានគោលបំណងបង្ហាញអំពីការងារស្រាវជ្រាវរបស់វិទ្យាស្ថានប៉ាស្ទ័រកម្ពុជា ក្នុងភាពជាដៃគូជាមួយវិទ្យាស្ថានស្រាវជ្រាវសម្រាប់ការអភិវឌ្ឍ (IRD) លើជំងឺពីរ គឺគ្រុនឈាម និងជំងឺលេបតូស្ពីរ៉ូស៊ីស (ជំងឺបង្កដោយបាក់តេរីដែលឆ្លងពីសត្វទៅមនុស្ស)។ គម្រោងនេះទទួលបានការគាំទ្រផ្នែកហិរញ្ញវត្ថុពីទីភ្នាក់ងារអភិវឌ្ឍន៍បារាំង (AFD) ហើយនៅពេលថ្មីៗនេះ ការប្រយុទ្ធប្រឆាំងជំងឺកូវីដ១៩ក៏ត្រូវបានបញ្ចូលទៅក្នុងគម្រោងនេះផងដែរ។
នៅតាមបណ្តាប្រទេសនានានៅអាស៊ីអាគេ្នយ៍ កំណើនសេដ្ឋកិច្ចយ៉ាងឆាប់រហ័សបានបង្កជាបញ្ហាមួយចំនួនពាក់ព័ន្ធនឹងនគរូបនីយកម្ម និងការអនុវត្តវិធីសាស្រ្តមិនសមស្របក្នុងវិស័យកសិកម្ម។ បម្លាស់ប្តូរទាំងនេះបាននាំឱ្យកើតមានជំងឺផ្សេងៗ ពិសេសជំងឺដែលរាលងំក្នុងតំបន់ ព្រមទាំងធ្វើឱ្យមានការរាលដាលជំងឺទៅកាន់តំបន់ភូមិសាស្រ្តដទៃទៀត ឬការលេចឡើងនូវប្រភេទជំងឺថ្មីៗ។
នៅក្នុងបរិបទនេះ វិទ្យាស្ថានប៉ាស្ទ័រនៅប៉ារីស៍ ដោយមានការគាំទ្រពីទីភ្នាក់ងារអភិវឌ្ឍន៍បារាំង កំពុងដាក់ឱ្យដំណើរការគម្រោង ECOMORE ដែលជាគម្រោងតាមដានផលប៉ះពាល់នៃការផ្លាស់ប្តូរអាកាសធាតុ និងបរិស្ថានលើការកើតឡើងនៃជំងឺគ្រុនឈាម និងជំងឺលេបតូស្ពីរ៉ូស៊ីស ហើយវាយតម្លៃពីប្រសិទ្ធភាពនៃការកែលម្អប្រព័ន្ធឃ្លាំមើល និងការពង្រឹងកិច្ចសហប្រតិបត្តិការជាតិ និងតំបន់ប្រឈមនឹងជំងឺទាំងនេះ។ គំនិតផ្តួចផ្តើមនេះត្រូវបានសម្របសម្រួលដោយវិទ្យាស្ថានប៉ាស្ទ័រ ជាមួយស្ថាប័នស្រាវជ្រាវជាដៃគូ ដែលមានមូលដ្ឋាននៅប្រទេសកម្ពុជា (វិទ្យាស្ថានប៉ាស្ទ័រកម្ពុជា និងវិទ្យាស្ថានវិទ្យាសាស្រ្ត IRD) ប្រទេសឡាវ ភូមា ហ្វ៊ីលីពីន និងវៀតណាម។
ពិព័រណ៍នេះបង្ហាញក្នុងលក្ខណៈអប់រំនិងងាយយល់ អំពីសកម្មភាពស្រាវជ្រាវ ការធ្វើរោគវិនិច្ឆ័យ និងយុទ្ធនាការផ្សព្វផ្សាយនៅក្នុងប្រទេសដៃគូទាំង៥។ តាមរយៈពាក្យពេចន៍របស់តួអង្គពាក់ព័ន្ធនានា ពិព័រណ៍នេះនឹងផ្តល់ការយល់ដឹងបន្ថែមអំពីជំងឺទាំងពីរដល់សាធារណជន ព្រមទាំងពីដំណោះស្រាយដែលត្រូវបានដាក់ចេញដើម្បីប្រយុទ្ធប្រឆាំងនឹងជំងឺទាំងនេះ។ វាក៏បង្ហាញផងដែរអំពីការគាំទ្រដល់មន្ទីរពិសោធន៍ឈានមុខចំនួន៧នៅអាស៊ីអាគេ្នយ៍ ដែលដើរតួនាទីយ៉ាងសំខាន់ក្នុងការប្រយុទ្ធប្រឆាំងនឹងជំងឺកូវីដ១៩។
លោកស្រី អូហ្វេលី បួរីស នាយិកាទីភ្នាក់ងារអភិវឌ្ឍន៍បារាំងប្រចាំកម្ពុជា មានប្រសាសន៍ថា៖ «ប្រទេសកម្ពុជាទទួលរងគ្រោះខ្លាំងពីជំងឺគ្រុនឈាម។ ពិព័រណ៍នេះ ដែលធ្វើឡើងក្នុងក្របខ័ណ្ឌនៃគម្រោង ECOMORE II នឹងធ្វើឱ្យសាធារណជនស្គាល់កាន់តែច្បាស់ពីហានិភ័យ និងជំងឺនានា ដើម្បីងាយស្រួលប្រយុទ្ធប្រឆាំងនឹងជំងឺទាំងនោះបានកាន់តែប្រសើរ » ។
ចំណែកលោកស្រី ឡូរ៉ង់ បារីល នាយិកាវិទ្យាស្ថានប៉ាស្ទ័រកម្ពុជាវិញ បានបញ្ជាក់ពីសារសំខាន់នៃកិច្ចសហប្រតិបត្តិការរវាងប្រទេសនានា ដើម្បីប្រយុទ្ធប្រឆាំងជំងឺគ្រុនឈាម និងជំងឺលេបតូស្ពីរ៉ូស៊ីស ព្រោះការណ៍នេះអាចជួយឱ្យអ្នកវិទ្យាសាស្រ្តចែករំលែកសមត្ថភាព និងពង្រឹងចំណេះដឹងអំពីជំងឺទាំងនេះ។ ការសិក្សាពីផលប៉ះពាល់លើប្រជាពលរដ្ឋ វិធីសាស្រ្តក្នុងការធ្វើរោគវិនិច្ឆ័យ និងល្បឿននៃការចម្លងរោគ ទាមទារឱ្យមានការចូលរួមជាលក្ខណៈពហុវិស័យ និងចម្រុះប្រទេស។ យោងតាមលោកស្រី ឡូរ៉ង់ បារីល វិធីសាស្រ្តបែបនេះ ដែលគេហៅថា «One Health» ឬ «សុខភាពរួម» គឺមានសារសំខាន់ណាស់ ដូចអ្វីដែលយើងបានឃើញរាល់ថ្ងៃពាក់ព័ន្ធនឹងការប្រយុទ្ធប្រឆាំងនឹងវិបត្តិកូវីដ១៩។ លោកស្រីបានថ្លែងអំណរគុណដល់ទីភ្នាក់ងារអភិវឌ្ឍន៍បារាំងចំពោះការគាំទ្រ ដែលផ្តល់គុណប្រយោន៍ដល់សុខភាព និងសុខុមាលភាពរបស់ប្រជាជន តាមរយៈគម្រោង ECOMORE នេះ។
សូមបញ្ជាក់ថា ពិព័រណ៍ដូចគ្នានេះក៏ត្រូវបានរៀបចំឡើងក្នុងពេលដំណាលគ្នានេះផងដែរនៅប្រទេសវៀតណាម និងឡាវ ហើយនឹងត្រូវរៀបចំនៅប្រទេសភូមាក្នុងពេលខាងមុខ។